news

Hlutir á heimilinu og hljóðið H - Málið okkar þemað 16. - 27. nóvember

17. 11. 2020

Þemað sem við erum að vinna í núna er Hlutir á heimilinu og hljóðið H.

Þegar við ræðum við börnin okkar yfir daginn þá er gott að leggja sérstaka athygli núna á hlutum á heimilinu. Þetta er hægt að gera í gegnum leiki og spjall og eins þegar við lesum bækur að spjalla um og benda á hluti sem tilheyra heimilinu. Börn læra með endurtekningum og í gegnum leik svo það er fínt að vera spjallandi sem mest þó okkur finnist við hljóma eins og biluð plata. Sem leik er hægt að nefna feluleik þar sem við felum okkur eða felum eitthvað inn á heimilinu og gefum þeim vísbendingar til að leita eftir.

Við hljóða æfingar er gott að tala um orð sem byrja á H og spyrjum hvort það heyrist H í hinum og þessum orðum og leggjum áherslu á það hljóð sem við eru að æfa hverju sinni.

Lærum og leikum með hljóðin er með frábært app sem nýtist vel í að fara yfir hljóðin og eins er Lubbi finnur málbeinið frábært efni með skemmtilegum lögum sem æfa hljóðkerfisvitundina sem og orðaforða. Fyrir skjátíma barna er gott að hafa í huga að velja íslenskt efni en inn á krakkaruv er gott úrval bæði af sögum og myndefni fyrir börn. Eins er frábært að hlusta með þeim á sögur en inn á bæði spotify og storytell er fjöldinn allur af sögum, leikritum og bókum.

Eins minnum við á mikilvægi þess að lesa líka fyrir börnin daglega en börn sem er lesið fyrir daglega heyra margfalt fleiri orð yfir daginn en þau sem ekki er lesið fyrir og styrkir það því málþroksa þeirra verulega.

© 2016 - Karellen