news

Leikföng og hljóðið N - Málið okkar þemað 19. - 30. oktober

19. 10. 2020

Þemað sem við erum að vinna í núna er Leikföng og hljóðið N. Hér er tilvalið að eiga góða leiktíma með börnunum ykkar og setja nöfn á leikföngin í leiðinni og lýsa þeim. Hægt er að velja sögur um leikföng eða búa til bullusögur um leikföngin sem heima eru.

Skemmtilegt er að fela nokkur leikföng undir teppi og fjarlægja eitt og spyrja svo börnin hvað sé það sem vanti og leyfa þeim að giska. Þetta styður við málþroska ásamt því að vera góð athyglisæfing.

Tölum mikið við börnin okkar allan daginn og lýsum því sem við erum að gera í gegnum allar athafnir dagsins. Börn læra með endurtekningum svo það er fínt að vera spjallandi sem mest þó okkur finnist við hljóma eins og biluð plata.

Tölum um orð sem byrja á N og spyrjum hvort það heyrist N í hinum og þessum orðum og leggjum áherslu á það hljóð sem við eru að æfa hverju sinni.

Lærum og leikum með hljóðin er með frábært app sem nýtist vel í að fara yfir hljóðin og eins er Lubbi finnur málbeinið frábært efni með skemmtilegum lögum sem æfa hljóðkerfisvitundina sem og orðaforða. Fyrir skjátíma barna er gott að hafa í huga að velja íslenskt efni en inn á krakkaruv er gott úrval bæði af sögum og myndefni fyrir börn.

Mikilvægt er að lesa líka fyrir börnin daglega en börn sem er lesið fyrir daglega heyra margfalt fleiri orð yfir daginn en þau sem ekki er lesið fyrir og styrkir það því málþroksa þeirra verulega.

© 2016 - Karellen